2025 жылғы 21-25 сәуір аралығында Алматы қаласында ветеринария мамандарына арналған микробқа қарсы сезімталдықты халықаралық тестілеу (АСТ) әдістері бойынша Қазақстанда бірінші зертханалық тренинг өткізілді. Тренинг Республикалық ветеринариялық зертханада (Алматы қ., Райымбек даңғылы, 221В) Біріккен Ұлттар Ұйымының Азық-түлік және ауыл шаруашылығы ұйымы ФАО мен Пандемияға қарсы қордың “Орталық Азиядағы “Бірыңғай денсаулық” тәсілінің негізінде пандемияға дайындық және жауап шаралары” жобасы аясында өткізілді.
Тренингке ҚР АШМ «Ветеринария бойынша ұлттық референттік орталық» ШЖҚ РМК-дан 3 маман қатысты.
– Пазылов Еран Құттыбайұлы, ВБҰРО Алматы филиалының Жұқпалы ауруларды диагностикалау зертханасының бас маманы;
– Оразбек Ақниет, ВБҰРО АФ Тамақ өнімдерін талдау зертханасының маманы;
– Испулаев Нұрсұлтан Ақынұлы, ВБҰРО Жұқпалы ауруларды диагностикалау зертханасының маманы (Астана қ).
Тренинг ФАО-ның агроазық-түлік секторында микробқа қарсы тұрақтылық мониторингінің ұлттық жүйесін қалыптастыру бойынша кешенді жұмысының жалғасы болмақ. Ағымдағы жылдың ақпан айында негізгі серіктестер – мемлекеттік органдардың, халықаралық ұйымдар мен мамандандырылған ұйымдардың қатысуымен салааралық дөңгелек үстел өткізіліп, онда ветеринариялық тәжірибеге микробқа қарсы тұрақтылық принциптерін енгізу курсы бекітілді. Наурызда еліміздің төрт аймағында пилоттық іріктеу басталды. Алматыда оқыту – оқудан өткеннен кейін жергілікті жерде практикалық жұмысқа кірісетін зертханалық мамандарды дайындауға бағытталған келесі кезең.
Мұндай оқыту қажеттілігі 2022 жылы ФАО-ATLASS құралын пайдалана отырып, Қазақстанның зертханалық жүйелерін бағалау миссиясы барысында анықталған болатын. Миссияның баяндамасында АСТ-ті халықаралық стандарттарға сәйкес жүргізу қазіргі уақытта, әсіресе ветеринариялық зертхана жүйесінде жетіспейтін құрал болып табылатыны атап өтілді. Тренинг Қазақстандағы пандемияның алдын алу, оған дайындық және әрекет ету, соның ішінде ұлттық зертханалық жүйелерін дамытып, «Бірыңғай денсаулық» тәсілін қолдану арқылы әлеуетін нығайтуға бағытталған Пандемия қорының қолдауының арқасында мүмкін болды.
Микробқа қарсы тұрақтылық үшін тұрақты зертханалық мониторинг жүйесін құру ФАО-ның 2021–2025 жылдарға арналған микробқа қарсы тұрақтылық жөніндегі іс-қимыл жоспарының басымдықтарының бірі болып табылады. Бактериялардың төзімді түрлерінің жаһандық таралуы жағдайында агроазық-түлік секторындағы жоғары сапалы мониторинг ветеринариялық және жалпы эпидемиологиялық қауіпсіздіктің құрамдас бөлігіне айналуда.
Алматыдағы оқыту Қазақстандағы микробқа қарсы тұрақтылық бақылау жүйесін дамытудың жаңа кезеңін ашып, стратегиялық жоспарлаудан бастап мамандарды практикалық оқытуға және білімді жергілікті жерде қолдануға дейінгі біліктіліктерін нығайтпақ.
